مقدمه في التشريح لطلاب الفرقه الاولي طب وفقكم الله !!!!!

السلام عليكم ورحمة الله وبركاته........
انطلاقا من رغبتنا فى مساعدة الطلاب الجدد وانطلاقا من محاولة لتنشيط الاقسام الطبية

نبدأ معا فى هذا الموضوع بشرح لبدايات مادة التشريح ...بالنسبة لسنة أولى
وحنحاول فيها نشرح شوية دروس بسيطة كبداية لفهم مصطلحات وبدائيات مادة التشريح

بحيث ان يبقى الموضوع اول ما تبدأ الدراسة ان شاء الله مايكونش الموضوع صعب
ويكون عندكم خلفية تساعدكم انكم تمشوا فى المادة دى شوية ...
وربنا يوفقكم
ونرجو من الجميع المساعدة والمشاركة ...حتى تعم الفائدة
تحياتى..


.







نبذة عن مادة التشريح



طبعا مادة التشريح Anatomy من المواد الكبيرة
بتدرس على جزأين الجزء الاول فى سنة اولى والجزء الثانى فى سنة ثانية
وكده تبقى انتهت مادة الاناتومى من السنوات الدراسية
ولكن...حتحتاجها بشكل كبير جدا فيما بعد فى الجراحة ..وكان رئيس القسم بيقولنا
ان التشريح نصف الجراحة...يعنى اللى عاوز يفهم جراحة كويس لازم يتأسس فى التشريح كويس...واللى ناوى على تخصص جراحة يعنى فيما بعد يبدأ بقه من دلوقتى يهتم كويس بمادة التشريح...


فروع مادة التشريح على مدار السنتين
Head and Neck
Upper limb
Thorax
Abdomen
Pelvis & prenium
Lower limb

وطبعا بيتقسموا جزء منهم فى سنة أولى وجزء فى سنة ثانية
وكل واحد حسب جامعته ..بس غالبا يعنى بيبقى فى سنة أولى
Upper limb
Thorax
Abdomen
وممكن كمان ال pelvis
وباقى الفروع فى سنة ثانية واكرر التقسيمة ديه بتختلف من جامعة لاخرى...

مادة التشريح على 500 درجة
250 درجة فى سنة أولى و250 درجة فى سنة ثانية
زى مادة الفسيولوجى كده...

بيبقى فى امتحان اعمال سنة فى نصف السنة كده وبيبقى معاه عملى كمان
غالبا بتبقى درجتهم 50 درجة من مجموع المادة الكلى
تقسيمة درجات المادة فيما بعد بتختلف من جامعة الى جامعة ولكن يظل امتحان النظرى
بتاع اخر العام عليه اعلى الدرجات تقريبا بيبقى عليه نصف درجة المادة كلها
وباقى الدرجة بتتقسم مابين عملى وشفوى وكمن مادة embryology

فرع الامبريولوجى ده او يعنى علم الاجنة ...ده كده فرع صغير تبع الاناتومى
عبارة عن كتاب بيتكلم عن علم الجنين ...وبرضه جزأين جزء فى سنة اولى
وبقيته فى سنة ثانية ...بس كتاب خفيف كده وسهل ودرجته مضمونة ان شاء الله
وغالبا بتبقى محاضرة واحدة من محاضرات التشريح مرة فى الاسبوع

ايه كمان.....؟؟ اه كمان العملى فى الاناتومى مهم جداا
لانك بتبقى غالبا مش متخيل اوىالشرح لكن لما تشوفه عملى بقى فى المشرحة الموضوع بيتغير خالص وبيثبت معاك كويس
علشان كده مش حوصيكم على سكاشن المشرحة لانها مهمة جداا وحتسهل عليك جدا جدا
وطبعا التركيز فى المحاضرات قبل كل شئ...

والمشرحة بقى مفهاش حاجة بتخوف خالص علشان القصص اللى بتتسمع قبل ماتدخلها دى ملهاش اى اصل من الصحة...والموضوع بسيط جدا واحنا اصلا مش بنشرّح كاترة هما اللى بيشرحوا واحنا بنشوف على الجاهز..ومفتكرش انك حتحتاج لاى ادوات للتشريح
خاصة فى الاول سنة يعنى...

الهيكل العظمى تبعا حتحاجه مش كله فى اول سنة بس على الاقل الاجزاء اللى حتاخدها فى اول سنة طبعا الحقيقى افضل بكثيير من الصناعى وانت حتفهم ليه لما تدرس بنفسك

والعظم عموما مهم فى المذاكرة لان غالبا كل فرع قبل ماتبتدى دراستة حتدرس الاول العظم الخاص بالجزء ده لانه حيترتب عليه بعد كده حاجات كثير ...
وطبعا بيجى فى اسئله فى الامتحانات وطبعا خصوصا فى امتحان العملى بشكل اساسى

طبعا البالطو مش حوصيكم عليه لازم يكون معاك فى المشرحة ..غالبا يعنى مش بيرضوا يدخلوا حد المشرحة من غيره (ده عندنا يعنى) مع انك مش حتعمل بيه حاجة بس هو النظام كده...

كتب التشريح ...مفيش كتب معينة للاقسام زى باقى المواد كل واحد بقى يشوف احسن كتب
بتنزل فى جامعته ويسأل الدفعات الاكبر فى نفس الجامعة عنده بس فى كتاب دكتورسامح دوس على مستوى الجامعات كتاب ممتاز جدا ... بس هو كبير شوية يعنى محتاج انك يبقى عندك وقت كويس متكنش عاوز الملخص يعنى وبرضه انت تتابع مع المحاضرات وتشوف ايه الزيادة وايه الناقص مهما كان الكتاب اللى بتذاكر منه
وكتاب الرسومات التوضيحية او ال digramatic مهم جدا وده غالبا بيبقى مع اى كتاب بتشتريه .. وده مهم علشان تفهم النظرى لان نظرى من غير الرسومات دى مش ممكن يتفهم
صحيح فى كتاب كمان كده اسمه General biology بتدرسه بعض الجامعات فى بداية العام كشئ تمهيدى قبل دراسة الاناتومى وبحتوى بقه على المصطلحات التشريحية
ومصطلحات الحركة ونبذة سريعة كده عن كل جهاز او نظام فى الجسم من الناحية التشريحية وبيبقى عليه برضه فى حدود 20 درجة كده بس مضمونين برده ان شاء الله

بس كده لو حد عنده اى سؤال تانى يتفضل...